07 janeiro 2012

Rabida Bida


Xintil ta suspira...


Buli di alvorada ti sol kamba

Dixi alguidar di cabeça

Pouza sonhus


Rodeadu na pe fidjus confortadu

Órfãos di pai bibo


Tentia pensamentu minina!


Dentul miséria sta fartura bu crença

Pon nosso cada dia, a cada dia


Na mei tudo es bran bran corpu ta atina ku diseju

Um corpu raskon, cumpanheru consolaçon

Socos, diskussons

Ná, sé nome certo al ser disiluzon


Bem na bo minina!


Drops, sutiã, ropa yá

Kel ke bu razon

Garantia bus toston


Rola bu pano, subil na cocoruto cabeça

Ruma bu tina

Poi pé na txon bu ruma a bu vida

23 julho 2011

Na pundi un sta


Djan carcuti memória na tenta situa...

Pundi nha ceu nubla
Nha canela ca susti
Sperança djunta cu fé e gota-gota dizaguan na ponta´l odju

Bri si faltan pedras na nha oril
Cadjan disgadja ku kes kin usti ranja

Assi npousa nha ferramenta...

Papel em branco mi na sukuru
Sem sabi si farol ki fundi ou si mi ki invental

Un mirgudja na mar brabu ki é nhas sentimentu
Ben di riba só toma folgu torna ruma cabeça baxu

Sem risposta

Sem luta

Discrenti salvamentu

Odju cerradu, corpo lajadu

Turmodi algum cusa un al agarra
Ka sperança inton a dor

21 novembro 2010


Nha alma é txuba disaforadu
Txon rassekidu nes curason
Ta ergui pa Deus um solusu cansadu
Lamento profundo
Maguadu
Distino di bai sem dia di ben

Nha alma prontia
Bota mon na enxada
Fazi simentera nha ser
Di manera ki nha korpu na otu morada
Ka perdi kel ki é disel

Nha alma lança rede na nha mente
Kel um fé di pisca
Um tom di verdi
Um som di txota
Alegria e afronta
Di um povo bensuadu
Di sperança rikompensadu
Na kel azagua speradu
Ki é biradu dipos di badu

17 novembro 2009

Shhhhhh


Sta keman alma
Duen sangui

Es silêncio dentu´l mi

Sta kalan nha paz
Barotan odju´l agua

Es silêncio dentu´l mi
Alinhar ao centro
Dja minguan nha surrisu
Sekan nhas palabra
Matan nha brio

Es silêncio dentu´l mi

Falta geral de tudo
Tempestade sem ponta bonança
Ausência nha presença

Kel silêncio....

É só mi q migra pa boh
Gana boita nha txon
Li di troxa na mon
Ta ruma a nha rubon

Dentu´l mi

17 outubro 2009

Amor eh Onda ku Areia


Pára di intentason

Nka pneu poh corri kuel

Ki fari karru lata bati-bati


Nha razon tem noçon

Ta bai na nha tom

Dentu´l nha determinaçon


Nes txon, sustansu eh na kanela


Si un bira na rabela

un prigu paralelu pegau koketa


Baai.... ka sta plutau

Kai nha riba ka sta ben djudau


Bu ta odja areia trás d´onda

ou onda ta lixonxa areia?


Kazu ki eh kazu sta na mon di Diós


Undi feitiu ta djunta ku feitiu

Faka ku matxadu ta reia


Ta inkostadu...

Inroskadu...

Naroskiadu...


Eh Kran! Eh d un bez

Amor di badiu eh EZ!!!!!!!

13 outubro 2009

Ka sperta di goci


Sukrinha xei di graça

Txan skorri dedu na bu boton


Rapazin dexan ketu

Bu kre eh pon na disgraça


Cinturinha pilon

Txan soh palpa bu kentura


Lumi bu al sinti sim

Si nha Dona botau mon


Mi ku boh tras d rotxa

Ken al sabi si bu ka papia?


Moss bu ata kre bulin

Ma mi eh rapariga séria


Nta fazeu nha patroa

Senhora nha korpu e kaza


Inton trazi bu pessoa

Un ta leba nha troxa

Di boh sin , dentu rispetu

Un al passa tudo bida na bu petu

Ka tudo kaminhu ki eh strada, ka td strada eh kaminhu




Dan xintidu nes kaminhu


Ntomal pa dimeu nba ta simia




Korbu pa tudo ponta


Txon gobernadu kaskadju




Sol ta sotan, Suor ta skorren


Firmeza Kran




Azágua ka ben


Lágua odju ka kai




Labuta manxi sukuru


Galo na kanta mi dja la ta bai




Txiga dia ki nhas odju brilha mas ki strela


Pa nha diante ka soh fartura kodjeta


Pa nha diante mas um monda ta intentan


Ta speran


Ta leban


06 outubro 2009


Eh pa tudo ponta
Tudo idade, tudo inkosta!
Crise dja bira familia
Bu al fla primo-irmon propi
Dja nu ti ata xobral na ALUPEC

KRIZI!!!!

Krizi nhas guentis ata ponu Krazy

Krizi di ikonumia
Krizi na natureza
Krizi di kes ki ta duenu na boisu propi riju

Krizi intelectual
Krizi di juízo (e di Juíz tb)
Krizi di poetas
Krizi di inovason
Krizi di cultura
Krizi kriason....

Na meio di nos krizi alupekianu,
Krisi ki nka obi eh di bibida
Di kurruptus
Di droga ta rola soltu na eroportu...

Nu ten krizi justiça
Má di kontroli d kes droga ki pegadu soh un incidenti

KRIZI!!!!

Eh bebeh ku krise dentária
Minis ku krizi identidade, existencial (???!!!)
Adultos ku krizi mental!!!!

Krizi ki eh krizi eh kel un

Eh krizi di spritu

I ku kel go un podi!

Inton dona Krizi....
Kutubelada na boh!!!
Ami, mi li, di nha mai ku nha pai,
Djan inocenta di bu palabra

És incerto


quem move, quem quer, quem beija, quem dá o stop, quem quer mais, quem diz sim, quem diz não, quem dá o passo para o incerto, quem ousa, quem diz q é errado, quem aposta q pode ser certo?

não interessa, no final quem manda é o desejo

11 novembro 2008

Morte de um poeta



Es contan ma um poeta
Ka debi skrebi sobre amor

É debi pruba de tudo sentimentu
Cucis bem dentul alma
Lume altu… fumo na céu...

Tudo al serena
Branda mansu
Pura
Morna…

Kel di banda ki amor ta da um mortal
Na um poeta ta matal

Na undi tudo ta fazi xintidu
É lá ki é perdison

Kel mundo paridu de contenteza
Na el palavra ka ta brilha...

E é si ki um poeta ta morri

22 julho 2008

Conbersu


Nhas palabras é onda kansadu

Lambuja na areia, rekua di mansu

Tão krenti na volta ki nem spuma ta fazi


Nha deseju é mar prendi sé rispiraçon

Céu diskompassa som

Areia perdi cor…


Nhas palabra é terço ki ka rezadu

Lumiadu abensuadu disprezadu

Tudo el oraçon ki ka papiadu


Nha sperança é milagre toma diantera

Spritu santu dixi nha bera

Nha corpo bira bu igreja


Nhas palabras é fidju bastardo

Conxidu ma ka reconhecidu

Nascidu do proibidu


Nha sina é ranasci di nha cinza

Vive di deseju

Morri di sperança

24 junho 2008

Mi na bô


Kaprin di memória bu lembransa

Kai na mar largu ki é sodadi

Na dibrua es sentimentu ki mi

Taná

Npensaba djan libraba

Djan ensaiaba palavras, falas

Sorrisus kontadus

Gestus mas spaçadus…

Bu txiga, nha juízo ausenta

Bu surri, ndisorienta

Ka é por si só

Na bus odju reflexu du ki nfoi

Kel mi di un bes

Kel mi disparcida

Ki ntenta suicida

Ami ki ta kreditaba ser livre

Nunka nstive na otu kau

Ki ka na bu olhar

15 abril 2008


Tempu dja sumaran, sondan, tentan

Ma ta parcel ma mi ka rapariga séria

Nta dal txucida, é ta kudin

Só pa é podi da korrida e mi siguil…

Ka bu dan boita mas ki si, branda bu passu, ben linsin

Dexan konxeu

Dan un só xanci di podi prendeu

E kredita

Oras ki nteneu, skeci kaminhu bai

Bé, nta stikau, ta nikau

Dispõe di bo manera ki mi intendi

Mambá bu kuda é certu

Skorregan pa dedu, fazen di kabra cega, disparci justo ora ki nta mesteu

Alau ta da rinkada pa bai, nem lamenta bu ka ta pirmitin

Karamba, si nfla ka ta kreditadu

Nen tempu korri tras di Tempu

02 março 2008

Não-definição do amor


Procurei por trovadores

Vasculhei centenas de cartas de desamores

No meu peito deixei dançar cupidos, ruídos, cheiros e cores

Perdi-me em prosa e poesia

Palavras, versos e gestos

Exigi pelas ondas resposta ao mar

Essa tão intensa e simples alegria

Ninguém soube me explicar

Nem o Céu

Orgulhoso da lua tão cheia de si que ostenta,

A Lua prenhe e escancarada em seus raios invisiveis.

Esse mesmo Céu, possuidor do Sol,

Se rende ao sabor dessa calmaria

E ordena à Lua que sorria

E à estrela maior que do alto nos espia

A gentileza de acompanhar tão poética melodia

23 janeiro 2008

Mercador de Sentimentos


Faço Versos por encomenda

Vendo Poema ao Vento

Alugo Sentimentos em forma de Poesia

Trafico a Emoção

Arrendo meu Tesão

Organizo festanças neste salão que é meu Coração

Minha Alma é per-ma-nen-te liquidação

Na montra, moldadas em todo tipo de variedade,

A Tristeza ou Felicidade

Trago em minutos seu Amado omisso

Aqui, barato, barato, todos os Feitiços

Fabrico Lendas

Dôo Crenças

Possibilito Esperanças

Bebo e dou de beber.

Letras a quilo

Palavras a metro

Frases a litro

Tudo ao alcance de um pedido

Para meu negócio inventaram um nome

Chamam-me Poeta

17 janeiro 2008

Pegan na Kexada, lamben nha Boca


Ben

Bata txiga

Rondan di mansu mansu

Mesmu dandu konta du ki nkre

Bu ta fulhan palabras doxi,

Homi mudernu, ka ta konkista mas cu pedra

Oras bu ta furfunhan kabelu

Pegan na kexada e lamben nha boka

Ta spian crenti ma djan é di bô

Oras bu ta raganhan pé

Na buska undi bulin

Djobi manera mas faxi di txiga na mi

Ala dja nta dexa korpu papia pa mi...

Bu konbersu ta dentran dentul fundu

Bu al fla raiz´l tambarina

Águ ta bazan na ladera´l kosta

Ta dixan cienti falta nha coxa al xinti bu carni

Rabidan, txuputin, rapikan

Fazi nha sabura, es é bu modus di aman

Basta bu barku inkosta na kais

Pruba calmaria

Dja é tempus bu labanta ferru

En bes di palabras bu al di fulhan é mi

21 dezembro 2007

Prinseza dizenkantada


Pa cada sentimento ki na nha petu ta marcha

É um padaz ki mi mé ta ranca

Pa ka fica prova di ninhum derrota

Djan da tantu di mi

Ki nha kabeça nca sta atxa

Nta djobi la longi, nta bata cravata

Kel poco sperança nta bata satadja

Pan ka spera o ki ka sta ben

Pan afasta nha odju la di lén

Pan sabi ma bô nka sta ten.

25 julho 2007

Rikumesu


N ka sta txora sodadi

Nen kanta amor dentu-l petu

N ka sta enaltece nos mar

Nem nos povo, rispirantis di sperança

Ka kre finka pensamento na es txon famintu pa un gota-l agu

Bu al fla, cusé bu sta djobi?

Cusa n kre é kel orgulhu ki nu ta obiba di um bes

Nos pai, nos nona, ta konta, ta kanta

“Liberdadi, sobrevivi, nu fazi pa nhos presenti”

Undi nos feitus? Kuse nu sta dexa, kuse nu sta fazi?

Sperança dja ka é suficienti

Mudança ka bali si for só mas un palabra

Mon na inxada djes botaba antis nos

Da petu pa patria, es nos gron di terra, djes da antis nos

Nos olhar, presu na passadu, ta dispresa prisenti, ka ten coragi djobi futuro

Dja nu kai na kontu di gerason infertil, ki ta só re-inventa o onti

Nos hora dja txiga

Fazi, contici, atenta, consentra

Sta na hora di rikumesu

Sta na hora di um riku kumesu

23 julho 2007

Gerrerus kaídus


Pa riba kalçadas deskalçus

Ruas abandonadu a ses propi azar

Guentis duspidus di

Diskrenti di ses txon

Ka ergui ses mon

Dizistidus, antis-l tenta

Di kombati a terra

Gerrerus disperdisadus

Ki ka atxa kauberdi undi ki é sta

Pátria ausenti-l alma

Identifikaçon

Kriaçon

Paradu na tempu

Diskuberta di ser kauberdianu

É ka na boita

É ka na partida

Ka so na kampu

Ka so na mar

Diskuberta é na kel speransa

Ki ka sabedu explikadu

Ma ki li dentu sta gatxadu, rikalkadu

Sperança disesperadu pa asfaltu a valorizaçon di kel ki é di nos

Sima reza pa kel gota-l txuba na nos lugar

Kel mar kalmu barrotadu pexi