Contam um contu

Contan um contu...
Ma dizmola

Kercen el um ponto
Ca bu dan um stória
Undi fim dja ta ben pronto
Falan sin, ma dexan divinha
Dexan rodidja
Ti ki nfica tonto
Ti ka...
Ora ki bu txiga na sapatinha ribera riba
Sapatinha ribera baxu
Disprindan nha respiraçon
Kalma nha coraçon
Baxa um poco bu ton
Kem ki sabi maz conta midjor...
Contan maz um, só maz um contu

Sem txuba na céu

Sukuta nha voz

Ora ki nsta caladu

Gemidu ki dentu mi

Nteni trancado.

Nha petu la frenti

Pensamento la tráz

Ta raboldi lembrança

Ta txafurda na sperança

Crenti ma éz odju modjadu

Um dia ta secadu.

Tra simenti di éz txon

Ki é nha coraçon

Guarda pa oto anu

Dja ki txuba ca ben,

É ta torna mondadu

Anu após anu.

Somewhere Over the Rainbow

Bu tenen

Ki rabuliço é kel li?
Ki maz ninguén ta sucuta
Bu ta roça na mi
Coraçon ta baten
Ta fladu asa banbaluta

Ma ki cor ki mundo dja toma
Ki maz ninguem ta rapara
Na nha petu bu ben mora
Incosta... sem pidi nada


Bu tenen duenti
Dementi
Bu tenem simplesmenti

Kual ké

Kual perdeu
Bu sta li ku mi
Na nha pensamentu
Na cada padaz di mi
Razon di nha deseju
Rumo certu di ntoma

Kual bu bai ké
Djobi!
Kuasi ta da pa toca
Bu presença na mi é claro
Na sorriso ki bu lembrança provoca
Nez l´água ta springan


Ná kual skecen
Si bô bu sta li dentu
Di modos ki nguardau,
Di bô bu ka ta rincan

Nau
Nha barco ka romba nau
É sta só perdido na mei di mar
Ta sucuta nha voz pa atxa sé caminho di volta

Gritus sem Eco

Oras ki bu ta ama
É kel bran bran
Coraçon ta xpludi
Spadja na bô interu
Infinitu ta parcebu lin sin
Strela ta bira pó noz volta
Bu spaçu, bu corpo, bu ar
Tudo prenha di el

Ma ohhh si bu Pilon
Barrotadu´l midju
Manduco ranega cotxi...
Encostadu na bu paredi
La é ta fica
Bô na botal odju, el na dispista

Kel grandeza´l sentimentu
Ki na bô ta cabi
Na el ka ta buli

I si bu ta passa vida ta guarda
Fodjas ki ventu ca soube leba
Gritus
Ki ka atxa sé eco

Bela Kasa: entre o céu e o inferno

Nben pan flau
Ma bu ca consigui matan
Inda nten na mi amor, esperança, sorriso
Não kel inocenti que bu destrui
Kel la, kel la sin bu consigui.
Nten sorriso de ken ki inda tem um dor na petu
Um mágoa transparente na odju
Ka foi só nha corpo ki bu violenta
Foi nhas sonhos, nhas desejos
Felicidadi ki ntinha direito
Tran luz di nha vida antes di n´spadjal dentu mi
Ma alan li, riju balenti
Sem dexau venci, sem dexan venci pa medo
Amargura ca rastan e alan li, prindadu na sperança

À Deriva

Ki tudo fica em silêncio
Palavra ca ser maz ovidu
Ki nhas sentimentu ka ser maz ki um mar imenso
E ki nha barco atxa, um dia
Sé cais

Vazio

Carinho, sorriso, deixaram de existir.
Pertence ao medo
Seus olhos refletem a solidão
Sua noite renegou a lua, esqueceu as estrelas.
Às manhãs, ao sol, à alegria... deu um fim!
Ainda ergue a mão débil
Procurando no infinito o que por dentro não encontra
Algo retido vagamente na memória...
No lugar onde morava o viver
Se vê passando, sem nada entender
Se vê morrer
Quisera gritar! Explodir! Renascer
A boca, porém, insiste em permanecer cerrada
Seu coração... esse, fez as malas e fugiu
Ela... que ela?
Ela sumiu
Dela nada resta
A não ser aquela lembrança, do que era... do que foi.

Razão/Emoção

Tenho de rever meus conceitos
Mudar de comportamento
Parar de ser tão crédula
Esquecer minha ingenuidade
Afugentar minha infantilidade
Provocar minha agressividade
Enfim... deixar um pouco de ser eu
Preciso de uma alavanca pra amadurecer
Um tranco que me desperte
Dançar e ninar a razão e a emoção

Palavras que ouvi: espírito e alma

Existem espiritos que, por não saberem viver, se alojam na alma dos outros
Vivendo por conta, escondidos de si mesmos.
E assim levam sua existência.
Outros, no entanto, não se contentam em viver escondidos
Libertam-se da alma que os aprisiona
Mas arrancam na sua partida pedaços da alma que os abrigou
Não se contentam em viver por sí só, destroem provas de que algo os alimentou.

Seremos capazes de reconhecer entre nós quais os espíritos e quais as almas?

Poesia em mim

Em minha vida
Tão cheia de desencontros
me encontro em poesia
Sou mimada pelos versos
Embelezada pelas rimas.
Mais do que uma simples invenção
Palavras se revelaram para mim
A liberdade de poder ser quem sou
A cada rabiscado uma benção
O orgulho de poder materializar minhas emoções, sentimentos
Vivências de quem, a cada dia,
Aprende a renascer e viver

O Ki.....

O ki bu ca podi pidi é o tudo o ki ncria ouviba
Ma ki nunca ta realiza

O ki nten na alma
Kel ki nka ta fla em voz alta
É tudo kel ki nta grita na escrita

O ki contici foi ki estrela ki stá ta brilhá
Kel la, maz alto ki cutelo
Luz ki tá nortean, sperançan
Kel estrela...apaga

O ki é verdade é ki bu xinti sem sabi
Kel sentimento ta ixizti, bu ka sabi kantu, bu ca sabi kuando

O ki sta li
Li é ta fica
Ti kandu txiga sé hora
Di abandona nha petu

Ta spera bu águ ben buscan

Cima mar ta akaricia rotxa
Ki ta fingi sta indiferenti
Seguro na terra, imponenti
É si ki bu olhar ta entra na mi
Ku paciência
Ta kebra nha resistência
Às vezes raboltiadu
Otos, mansu mansu
Ti ki nu ta fundi na kumpanheru
Nta intrega, bira areia
Desliza na bu imensidon
Ala... um dia bu ta largan
Disesperadu nta bizia terra
Construi di novu nha fortaleza
Di guarda, di sentinela, ta spera bu águ ben buscan

Meu orixá é o Amor

Em meio à Natureza
Eu sou o Vento que se arrasa
O Mar que esbraveja e se aquieta
Tem sua maré alta e baixa.
Eu sou o Sol que ilumina
E o mesmo sol escondido por entre nuvens
Eu sou a Terra Mãe
Mãe de dores e alegrias
Sou a força da Luz, representante das Trevas
Os dois lados de uma única Lua, a radiosa e a obscura
Eu sou, eu tão pequena
Parte de algo maior, transcedental
Criadora de meu Mundo, escrava em meu Corpo
Tenho toda a natureza em mim e meu orixá é o AMOR

Ta crê teu, só ta creu.

Bu tenen preso na bô
Nhas pensamentos rodidjadu na lembrança
Ta crê skeci ta crê lembra
Ta crê teu, só ta creu.
Cada padaz di bô impresso na mi
Abô la, ami li
Abô na oto, ami na bô
Dexa vida da boita
Dexan skeceu nta mostrau
Bu ca mereci nhas sentimentus
Dexan pou cai na skecimentu
Dja txiga di reclamau
Abô, ki nunca foi dimeu
Só nha coraçon propi, pa insisti nez fogo di teneu.

Txon ki parim, ki criam, txon di meu!!!

Triste distino és di nós

Larga nós txon, nós irmon

Pa djobi vida, um direçon

Coraçon satadjadu di dor

Dor de um sôdade trispassadu

Pan da um alento a nha alma

Nta rabolbi lembranças...

Quebra-Canela la di Cruz di Papa

Bexu ta djobi boca na Farol

Tocatina na 5tal

Ami na nha terra!

Ahhhhh lembrança...

Si ca fosse lembrança

Nhas odjo ca ta lumiaba.

Nhas guentis ... morabeza Cabo Verde,

Areias di um txon ki nconchi

Txon ki parim, ki criam, txon di meu!!!

Forti nteni gana pisau.

Djan nega ama

Nunca más nta dexa alguén pon na altar

Nunca más ser pa kel alguen sé ar

Nunca más dexa sés odju brilha pa mi

Nem sé boca sta sen dimeu

Nha amor nca sta da

Oto amor nca sta toma

Nca sta ben credita na sé paixon

Pamodi ora ki nsai di sé curaçon

Tudo ki é el ta fica na mi

Na nha odju modjadu

Desalento di nhas palavras

Luz na nha petu pagadu

E sperança mesmo si!

És poco ki é mi e ez sentimentu ki é tudo

Nhas palavras ca sta ben comoveu

Nhas desculpas ca ta convenceu

Nada du ki nfazi sta pou volta a ser nha cretcheu

Cusé ki nta xinti el é dimeu

Nca sta ben grita nha carência

Nca sta ben tchôra bu distância

Si ki nsta bu frenti

Ku poco pa ofereceu

És poco ki é mi

E és sentimento ki é tudo

Talvez pa bô ca ta basta

Ma nada ta pom ta rasta

Si bu quiser bu bata afasta

Nta skeceu, éz amor di mi nta arranca

Si bu cren

É si ki bu tem ki tomam

Sem rebaxan

Sem matam...

Alan li bu frenti

Ku poco pa ofereceu

És poco ki é mi

E és sentimento ki é tudo

Buliçon di alma

Éz buliçon di alma

Ta disnortean, afligin

Ta mansan timenti é ta sacudin

Nta sta fora mi.

Na bu petu

Tudo na paz, tudo dretu

Ti ki bu ta rabolben nha leito

Nta da cu mi sem abrigo

Pára de grabata nhas sentimentu

Ruma bu mala, sai di nhas pensamentu

Ca bu dexa nha coraçon néz turbulência

Dje sta mondadu, ramondadu

Ca tem txuba ki ta salval

Ou inton bem bu fica

Bem bu toman

Bem bu curan

Dez duença ki bô mé bu provocan

Nha tcheia ta corri pa dentu

Pa ké spreta nha alma

Obi discompasso nha coraçon?

Ca mesti secan nha rostu

É pa dentu ki nha tcheia sta corri.

Djan ca cu perdi di mi

Nhas sentimentu nca sabi màz distrança

Ncreu ma nca teu

Bu tenem ma bu ca cren...

Cudadu dja dan

Cu és disgobernança és confuson

Midjor ki nta fazi é disisti di mi

Só si pan disisti di bô.

Tran ez amor di nha petu

Bô bu sabi cusé ki é bu da

Sem bu ser tomadu

Corpo, alma tudo entregadu

Tem bu curaçon negadu...

Bô bu sabi cusé ki é ama

Sem bu ser amadu

Bus sonhos.. tudo pa el voltadu

Bu orgulho podu di ladu

Bô más ki ninguén bu sabi

Ma palavras nunca sta bem tchiga

Ma só bu amor ca sta manteu aquecida

Kel ki bu sta xinti bu ca sabi lida

Bu sabi e bu ta xinti

Ku bus sentimentos bu ca podi briga

Kel ki ben, ben pa fica

Na bu petu kel amor dja finca

Bô bu sabi e bu ta intendi

Flan, enxinan mó ki nta skeci

Pamodi djan cansa

E di mi és amor ncrê ranca.

Undi bu sta?

Djan djobi pa altu

Djobi pa baxu

Baxu mar

Riba horizonte

Sol ta nasci

Amor ta pom

Pom ta sunha

Sunha cu bô

Sem n’sabi kem ké bô…

Nca sta procurau

Ncrê atxau

Ca ta corri bu traz

Ma nha odju sempri ta spiau

Undi bu sta… é bô ki ka sabi

Dentu nha petu ma ti inda nca odjau.

Prenúncio di tempestade

Nsta odjau ta bata spreta

Tráz di porta ki é nha alma

Ka bu cuda nsta dexau volta

Da boita na nha vida

Tran di éz segurança ki é nha ignorância

Só pa trazen bu sorriso

Bu doçura ora ki nsta azedu

Bu olhar ki ta incantan

Bu voz ki sabi mo ki é ta ninan

Ná, pa ké bem mesteu

Se bu ta dan paz pa leban inferno

Se nha coraçon mimado é prenúncio de tempestade

Xintadu ta papia cu mar

Quem ki sabi undi ndexa nha coraçon

Modi ki n'tem vividu sem direçon

Na undi ki n'panha tanto dor

Pamodi n'larga mon di nha distinu

Modi ki nperdi di nha caminhu...

Xintadu ta papia cu mar

Lembrança ta rola moda onda

Nhas lágrimas, sé spuma...

Nha felicidade ca sta na nha mon

Sta na um sonho, num iluson

Nha lamento é ca di um amor perdido

N'ca ta perdi o ki n'ca tem

Nha lamento é di amor na nha peito sucundido

Pan pára pensa

Pan pára sufri

Pan acalma

N'tem ki lava nha alma

Ahhh Badia

É bô badia

Ben flam

Di undi ki bu ta tra tantu força...

Carrega lata d'água

Mininu na costa

Salta rotcha

Skiva dificuldade

Parci na fotu di turista

Cu sorriso di felicidade

Badia

Flan modi ki dipós di tantu monda

Di noti bu ta ranja briu pa bu buli

Seis, seti fidju spadjadu num quartu

Ah badia, na mei di tantu afronta...?

Bô badia, ki ta sustenta bu casa

Mostran cusé ki ta sustentau

Kem ki pariu logo ranjau marido

Marido na strangeru, más um ki largau

Ta da riba ta da baxu

Trás di cusé bu sta?

Nem bô bu sabi ma nada ka ta parau

Bu ta continua ta subi dixi ladera

Ta monda sem tchuba na ribera

Spera ken ki ka sta bem

Carrega bus fidju

Sempre cu odju la lem.

Ah! badia kem ki sabi

di bus sonhu?

Djés tchomau di pé ratchadu

Ma ninguén ca djobi bu coraçon

Abô é más ki kel simples difiniçon

Di mudjer la di fora, lata d'água na cabeça

Matchadu na mon...

Sem bu sabi cusé ki é vida

Sem nós nu odja

Nu ta assisti triste strangeru a bô ta pontau

Como liçon di vida.

Bô bu ca ta odja bu coragem

Bu ca sabi di bu resistência

Bu sabi só ma bu tem ki bata anda

De um pedra pa kel oto

Ta spia tchuba na céu, dia di tcheia

Um minino na costa, oto na barriga

Bus odju triste e bu sorriso

na carton-postal di nós terra...